Thursday, Apr 17th

Last update03:38:03 PM GMT

You are here Karya Tulis Jilatang Persiapan si Sabai Manjalang Pilkada

Persiapan si Sabai Manjalang Pilkada

E-mail Cetak PDF

Dek urang ka Pilkada bulan Oktober bisuak ko, Sabai mambuek inisiatif politik nan hebat.
Manuruik pikirannyo nan jenius tu, ikolah kesempatan mambuek partai baru.
Partai baru ko buliah bisa dijua, untuak dijadikan kendaraan dek urang-urang bakepang nan ingin mancalonan diri manjadi kapalo daerah.
Partai perempuan nan paralu dibuek. Kalau partai perempuan, pasti calon laki-laki labiah suko manjadikannyo kandaraan.
Indak cuma kandaraan politik sajo, tapi juo kandaraan nan labiah hebat pulo lai pado taksi ijau.

Kalebuik Sabai. Meja tampek Sabai manulih kini lah dipagadang.
Di ateh meja tu lah tabukak laptop, komputer canggih nan bisa dilipek-lipek, handphone Komunicator sagadang batu asahan, rokok lua nagari, galeh bakaki tenggi, karateh mangarateh.

Nan badan diri Sabai lah batuka pulo gayanyo kini. Rambuik lah pendek saroman cukua paloka, bacat pulo saroman warna capucino, indak pakai salendang lai, kacomato tagantuang di dado, buah baju tabukak pulo duo tampek mancogoknyo pangka susu..

Kutiko Mangkutak adiaknyo nan suko balayang-layang tu tibo, Sabai langsuang manyandaan badannyo ka kurisi baroda.

“Alhamdulillah, Mang. Kasudahannyo tabantuak juo Partai Kaum Perempuan Peduli Hidup Mandiri. Tujuah hari tujuah malam Ai mamimpin rapek formatur. Ikolah hasilnyo,” kato Sabai sambia manunjuak ka karateh nan baserak di ateh meja.

“Iyo hebat aciak den,” kato Mangkutak kagum ka kakaknyo tu.

“Mudah-mudahan tahun kini kan tahun kebangkitan kaum perempuan. Apo nan alah aciak buek tu adolah sejarah. Sejarah tentang perjuangan kesetaraan,” kato Mangkutak pulo.

“Memang. Ai indak mau gembar gembor. Kesetaraan gender tu harus diperjuangkan sampai titiak darah penghabisan,” kato Sabai sambie mambaka rokok 555.

Sudah tu nyo puta latak laptop, madok ka Mangkutak. “Caliak dek waang Mang.
Iko susunan pengurus partai Ai,” kato Sabai.

Mangkutak mambaco susunan pengurus partai kaum perempuan di layar laptop.
Tapi pancaliak an Mangkutak tagaduah saketek dek gambar padusi pakai bikini nan manggarik-garik manilungkuik, manilantang, manunggiang, manggoyang-goyang ikue di suduik bawah layar laptop tu.

Mangkutak anok sajo, sakali-sakali mancaliak gambar “hot” padusi saroman tu iyo sero juo.
Di layar tu lah tatulih gadang-gadang susunan namo-namo jo jabatannyo sakali.
Itulah kini nan mulai nyo baco dek Mangkutak.

Ketum Sabai Nan Aluih.
Karo Penampilan Amai Puti Galang Banyak “Ketum ko apo aratinyo ciak?” tanyo Mangkutak. “Ketua Umum,’ jawek Sabai.

“Karo?” tanyo Mangkutak pulo.
”Ketua Biro,” jawek Sabai.

“Baa kok pakai Amai sadonyo namo karo tu ciak?” tanyo Mangkutak sasak angok.

“Amai tu kan samo aratinyo jo ibu. Bacolah taruih, nantik ka jaleh diwaang Mang, baa bana potensi partai kami ko,” kato Sabai pulo.

Mangkutak taruih mambulalangi layar monitor laptop tu.

Karo Pengabdian Kepada Ayah; Ibu Amai Siti Baheram, Karo Pemeliharaan Kasih Anak; Amai Puti Lenggo Geni, Karo Pengawasan Apak Paja; Amai Puti Talipuak Layua, Karo urusan tamu-tamu; Amai Siti Kalasun, Karo Perlengkapan; Amai Puti Gondan Gandoriah.
Karo Penyerapan Dana; Amai Basusuak Intan.

Banyak karo-karo nan lain tatulih di sinan.
Indak talok dek Mangkutak mambaco nyo lai doh.
Paniang kapalo Mangkutak mambaco namo karo-karo tu dek banyaknyo.
Kok lah kini pulo karo baagiah namo.

“Karo-karo tu dibantu pulo dek kabau-kabau mah Mang,”

“Kabau?” tanyo Mangkutak.
“Kepala Bagian Umum,” jawek Sabai.

“Takana diden ciak, manga sabanyak tu bana karo jo kabau dalam partai aciak tu?” tanyo Mangkutak sambia maapuih paluah di kaniangnyo.

“Samakin banyak karo jo kabau, akan semakin kuat dan besar partai itu. Baitu manuruik teori politik. Ai kan lah masuak kursus ESQ bagai. Lah hebat aciak waang ko kini mah Mang,” jawek Sabai manapuak dado.

“Tando gambar partainyo alah babuek ciak?” tanyo Mangkutak pulo. Sabai tagagau.

Iyo pulo. Tando gambar partai padusi apo yo? Tamanuang Sabai mamikiekan.

“Tando gambar partai Ai harus menggambarkan perjuangan persamaan gender,” kato Sabai tegas.

“Gender tu aratinyo kelamin, ciak. Persamaan gender tu samo artinyo jo persamaan kelamin. Kok gambar kelamin laki-laki jo kelamin padusi tu dibuek sajajar baa?” usul Mangkutak serius.

“Hantu waang! Manga indak waang usulkan sajo gambar beha atau softex!” hariak Sabai tarabo dek maraso dipalok-olokan.

“Agak hati den, nan sasuai tantu gambar cangkie sadang dikacau sendok,” kato Mangkutak turun janjang.
“Paja bodoh. Indak tantu ma nan proyek, ma idealisme. Indak tantu nan ma nan mangacau dan nan ma nan mangacau,” garutu Sabai samo surang.


Dikarang oleh : Wisran Hadi