Jurus si Buyuang

  Rating: 0 ( 0 Votes)
Dikirimkan pada 12 May, 2014 | Dibaca: 859 | Nomor Artikel: #0336
Sarankan Laporkan Print Favorit

Karatau madang diulu, babuah babungo balun, Karantau bujang daulu, di rumah paguno balun

Satonggak pantun ko bana-bana berkesan dek buyuang karojan. Pantun kenangan, induak sagalo pantun nan inyo pahami, baa mode itu sanak. Baiko caritonyo. Saisuak katiko buyuang mudo matah, kok bantuak lai cukuik, gagah indak-buruak talampau. Pintar indak talalu, bodoh pun bukan, tapi kok tasasak lai indak ilang aka, takana juo silek lamo tu, pandai mancari tampek jatuah.

Dek buyuang mudo tangguang, alah mulai tampak kaniang bakilek, galak manih kamanakan angku datuak yo manggilo. Kok siang ka buah angan, kok malam manjadi rasian, tapi sabalun talalok, maetong-etong kasau daulu. Tapi ado ciek nan marusuah, tiok ado kaniang bakilek, tiok ado galak nan manih, urang rantau juo nan mambao. Bacarai juo pinang jo tampuaknyo, apolah katenggang si carano. Ternyata itu bana nan tajadi di si Buyuang. Sadang arek basurek-suretan, bak cando pujangga pantun di lapeh. Baitu pulo nan si upiak, yo da buyuang bana nan kaninan. Tapi disinan kasiah tak sampai, datang garudo dari rantau mambao tabang. Disinan aia diminum saraso duri, nasi dimakan saraso sakam. Bahabih patang ba habih ari, duduak tamanuang disuduik kampuang. Talang sarueh indak mangkuih, malawan bendi bugih dari jao.

Sampailah buyuang ka kaputusan, dirancah pulo rantau jauah. Kok untuang lai mujua, maungkok rasaki datang, taubek juo luko diri. Jiko susah nan di tape'i, lareklah badan di parantauan, bialah rantau di pajauah, marantau Cino urang imbauan. Mako bajalanlah bujang, masuak kampuang kalua kampuang, masuak kota kalua kota. Dima pasa disinan galeh dikambang, dima rami disinan galeh di jua. Dek lai rasaki ado, takumpua pulo benggo agak sapuro. Takana dek buyuang handak pulang, manjinguak kampuang nan batinggakan.

Alah sampai ukatunyo, pailah buyung manyeo bendi, tukang rental oto bahaso kerennyo. Di seo oto agak limo baleh hari, indak ka usak bana untuang galeh. Di bali pakaian sapatagak, licin mangkilek, basandiang suduik-suduiknyo, yo barubah bana rono si buyuang. Takanalah buyuang jo pantun lamo, ilang rono dek tiado. Mambaleh dendam si buyuang pulang malah kironyo. Baru sajo oto masuak kampuang, sangajo bana buyuang bakuliliang, dima rami pura-pura basilaturrrahmi. Saminggu buyuang di kampuang, alah harum namonyo ka suduik kampuang. datanglah ciek duo urang marosok, ka maambiak buyuang jadi minantu. Buyuang kini galak-galak sengeang, manyisiahkan ma nan ndak katuju. Singkek kaji, jadilah buyuang sumando idaman, babendi bugih bakilek dari rantau, buah tutua di lapau suduik.

Sakian dulu

Cerita ini hanyalah rekaan, hanya cerita perintang sore, menunggu macet selesai. Tapi ini satu fenomena yang tidak terlalu mirip terjadi di Minangkabau, mohon maaf kalau ada yang "tagisia".

Salam

Andiko Sutan Mancayo

Artikel Terkait