Kawin Sapasukuan

  Rating: 0 ( 0 Votes)
Dikirimkan pada 12 May, 2014 | Dibaca: 717 | Nomor Artikel: #0332
Sarankan Laporkan Print Favorit

Udin : Assalamu alaikum, inyiak Basa !

Basa : Alaikum salam, 'Din.

Udin : basobok awak di siko, Inyiak. Layi siaek miang, Inyiak ?

Basa : Al-hamdulillah, cando iko sihaek no.Layi takao juo bajalan manyilau cucu.

Udin : Inyiak ! ambo lah duo kali ka rumah Inyiak, tapi Inyiak indak ado di rumah. Mujua bana awak basuo di siko. Ado nan ka ambo tanyo-gan ka Inyiak.
Kan indak baa siko miang.

Basa : kadia no du, indak baa siko. meya nan ka diang tanyo-gan ?

Udin : Ka lapau antun lah awak, Inyiak.

Basa : Jan layi. Kok ado bagai nan tarumik, indak rancak tadanga di urang lain.

Udin : Di palanta antun miang lah Inyiak. Sinan awak duduak.

Basa : Baa kaba. Meya masalah nan ka diang tanyo-gan ?

Udin : Iko Inyiak, parkaro kawin sumbang kawin sapasukuan. Lah bagunjiang miang urang. Baa du, Inyiak ?

Basa : Kawin sumbang antun, kok di ugamo buliah miang, indak ado larangan. Tapi di adat sabagai awak urang Minang nan mandalam raso Minang-no, iyo agak barek di no kawin sapasukuan antun. Agak miang lah diang du, samo di no jo mangawini adiak atau kamanakan-no. Baitu bana mandalam raso Minang antun.

Udin : Kan lah banyak na lah tajadi kawin sumbang/kawin sapasukuan antun, Inyiak ?

Basa : Iyo, bagi urang nan kurang mandalam raso Minang-no, indak baa di no, sadangkan badunsanak ibu layi nan kawin. Mungkin karano di ugamo indak balarang. Apo layi nan gadang di rantau, indak mandalam raso Minang di no. Kok layi bana, tapi mipih.

Udin : Baa bana raso Minang antun kalau awak sapasukuan, Inyiak ?

Basa : Den agiah conto ke ang. Umpamo-no awak ang barangkek jo oto bis ka Jakarta.
Kabatulan di sabalah tampek duduak ang bausuak-usuak jo ang ado padusi nan agak barupo saketek, mudo bulo layi. Maaf mangecek, tabik salero ang mancaliak, turun naiak jakun-ang dek mandaguik.

Udin : Iyo Nyiak, anak mudo lah namo-no. Maaf ambo mangecek, Inyiak ! salero sadang tagak tali. Inyiak kan mudo bulo saisuak ?

Basa : Dalam perjalanan, tantu diang lawan ano mangecek.

Udin : Tantu iyo Nyiak.

Basa : Diang tanyo-gan keno : dari ma, ka payi ka ma, di ma kampuang, meya suku ?

Udin : Iyo du Nyiak !

Basa : Dijawaok-no ke ang, nan baso ano... payi ka Jakarta, ano urang dari Pek Eten kampuang Tiaka Payobasuang. Dikecekgan no ke ang suku no Piliang.Baa parasaan wak ang, mandanga-gan suku no Piliang antun ?

Udin : Maramang kuduak ambo, Inyiak. Kalua paluah dingin. Kamanakan ambo mah kiro-no.

Basa : meya jano ang keno ?

Udin : Ambo suruah ano ba mamak ke ambo. Ambo kecek-gan keno : awak gau kamanakan den. aden urang Piliang pulo.

Basa : Tantu alah batuka sumangek ang, karano wak ang jo kamanakan-ang

Udin : Iyo Inyiak. Kok mangecek jo no lah basuadeh, jo kamanakanlah namo-no.

Basa : Sakiro-no ado urang nan mangijok-ngijok no, baa jano ang ?

Udin : Tabik suga ambo, Inyiak. Kamanakan ambo digaduah urang. amuah ambo maninju urang antun.

Basa : Itu tando pakek perasaan Minang ang du !

Udin : Salamo dalam perjalanan, ambo jago bana.

Basa : Kok baranti makan di lapau, tantu wak ang nan mambayia ?

Udin : Tantu iyo Nyiak. Indak ambo pabia ano mangaruak kurapai-no. Munkin sampai di Jakarta, ambo antek-gan ano ka rumah-no nak basuo bulo awak jo amai tangah awak sinan.

Basa : Kan lah jaleh diang du, baa bana raso Minang antun. Itulah sabab-no indak amuah urang kawin sapasukuan, Barek bana bagi urang nan mandalam raso Minang dino.

Udin : Tantu iyo, Nyiak. Kan banyak padusi nan lain, mangko nan itu juo dijadi-gan. Antah kok lah masuak dayoan syetan ibilih.

Basa : Kok di ugamo awak, buliah indak ado larangan.

Udin : Inyiak ! taisuak suku Koto jo Koto, suku Piliang jo Piliang, tantu sumbang indak ado ambiak maambiak.

Basa : Iyo sumbang. Tapi urang tuo-tuo taisuak, karano anak kamanakan lah bakambang biak lah rami, diambiak-no kabijaksanaan nan suku nan lah kambang bana, dibagi-no bakalompok, sarupo suku Koto dibagi ampek, yaitu : Koto Gobah, Koto Musajik, Koto Salek Batuang jo koto Ateh tabek. mantun bulo suku Piliang dibagi Piliang Laweh jo Piliang Katiek. Diantaro kalompok antun buliah ambiak maambiak, indak sumbang layi.

Udin : o, mantun du, Inyiak ? Baa suku-suku lain ?

Basa : Layi juo. Tahu ang, diwakatu Japang ka masuak, almarhum Mak Haji Badu Rauih (Abd. Rauf) di Tangah Koto, alah dimupakaek-i-no jo niniak mamak Tangah Koto, nan urang Pisang samo urang Pisang, buliah ambiak maambiak, asa jan nan saparuik/saniniak jo pangulu-no nan samo gala-no. Tanyo-gan diang bake atiak Amun Sutan Pangulu, ano tahu du. Mak Haji Badu Rauf mintuo-no du.

Udin : Iyo Nyiak, di Tangah Koto antun kambang bana urang Pisang, tigo puluah satu pangulu di Tangah Koto, sambilan baleh pangulu suku Pisang.

Basa : Jadi indak sumbang layi, dek karano lah dibuliah-gan. Cuma urang agak ngari malansuanggan-no.

Udin : Kok mantun baa du Inyiak. Tisuak urang tuo-tuo, suku-suku nan lah bakambang biak, dibagi-no bakalompok. Kini go sarupo suku Koto Gobah, Koto Musajik dll lah bakambang bana. Kok dibagi bulo bakalompok baa du, Inyiak ? Jadi buliah ambiak maambiak antaro kalompok antun, asa le indak saparuik/saniniak, indak sumbang layi.

Basa : Indak baa do. Dimupakaek-I jo Karapatan Adat Nagari (KAN). Kalau lah bulek mupakaek nak mambagi-bagi kalompok suku-suku antun, lah buliah du suku Koto Gobah jo Koto Gobah, suku Koto Musajik jo Koto Musajik dll ambiak maambiak, asa le indak saparuik/saniniak, indak sumbang layi.

Udin : Jadi pikiran kami nan mudo-mudo, Inyiak masalah kawin sumbang antun, kan buliah bulo diubah dan disasuai-gan bulo jo kaadaan maso kini. Umpamo-no mambagi kalompok suku-suku nan alah bakambang.

Basa : Iyo ! KAN buliah sakirono samufakaek marundiang-gan masalah kawin sumbang antun, sarupo urang tuo-tuo taisuak mambagi kalompok suku Koto jo suku Piliang nanlah bakambang bana.

Udin : Jadi Inyiak, suku-suku nan lah bakambang bana sarupo suku Koto Gobah, Koto Musajik, Pisang dll, sasudah dibagi ba kalompok, tantulah buliah ambiak maambiak. Indak sumbang layi.

Basa : Iyo! jolong-jolong 'nko tantu agak barek di urang malansuanggan-no, karano alun tabiaso lai.

Udin : Tapi kan indak sumbang layi, Inyiak. Indak ado gunjiang layi, karano "Buek Nan Balingka" alah mambuliah-gan. Taisuak urang suku Koto Gobah jo suku Koto Musajik, urang suku Piliang Laweh jo suku Piliang Katiek, tantu agak barek bulo dino mamulo-i. Tapi lamo bakalamoan, indak baa layi.
Baitu juo nanti urang Koto Gobah jo Koto Gobah, Koto Musajik jo Koto Musajik nan indak saniniak/saparuik jo indak samo gala pangulu-no, tantu indak baa dan tabiaso miang nanti-no du.
Dan Marubah Adat Istiadat antun supayo nak sasuai jo ugamo, tantu lah tapek bana du karano Adat awak basandi Syara'. Apo layi bak kecek urang kini : Disasuai-gan jo situasi jo kondisi.

Basa : Iyo du

Udin : Inyiak, ambo ka payi ka pasa, ado janji jo kawan. Iko saketek pambali rokok anjik Inyiak. (Udin mamasuakgan sasuatu ka sakuih Inyiak Basa).

Sumber : BSP 14 April 1986
Disadur Oleh : Erwin Moechtar

Artikel Terkait