Kok Indak Takuik Mati

  Rating: 0 ( 0 Votes)
Dikirimkan pada 12 May, 2014 | Dibaca: 630 | Nomor Artikel: #0325
Sarankan Laporkan Print Favorit

ADO curito tahun ampek limo. Kutiko tu parewa alah kalaih 2 sakola rakyaik (SR). Sasudah Japang kalah, sakolah rakyaik itu batambah satuan, jadi sakolah SR tu anam taun lamonyo.Bukitinggi tahun 1946. Bukittinggi disabuik juo gaduang sangaik raminyo. Sangkek tu Parewa sakola di SR Agam. Satu jalan ka SR Agam, satu ka Kampuang Cino, mandaki ka Banteang, babelok ka kiri., ado gaduang sakola balantai papan, di jamannyo tamasuak rancak, gurunyo banamo pak Saibu, papuler jo disiplinnyo.

Lai tau dima Parewa tingga?.
Di tansi Birugo. Tantara awak, sasudah dari lasykar jadi Tantara Rakyaik Repubulik Indonesia, kudian jadi Tantara Keamanan Rakyaik (TKR), baru kudian jadi Tantara Nasional Indonesia (TNI).Iduik di tansi Birugo, iyo takana pulo kantinnyo. Parewa kadang-kadang alah jadi tobang. Tobang samo sajo jo kalene, anak ketek tukang japuik nasi ka dapua umum. Manjalang parang kamerdekaan satu, sasudah kota Padang diduduki Bulando, iyo banyak urang mangungsi. Bukittinggi iyo sabana rami. Sangkek tu, tantara awak lah mulai taratur. Alah ado kompi-kompi.Ado kompi barahun, ado kompi bakapak, ado pulo kompi bakipeh. Pron Padang takana bana kutiko tu. Kompi-kompi tantara awak tu bagilia pai ka pron.

Di tansi Birugo, banyak kudo, kudo-kudo paninggalan Japang. Nan takana kutiko tu ado kudo nan banamo Tiang Bungkuak. Dalam pacu kudo di Bukik Ambacang, kudo Tiang Bungkuak tu salalu manang.Kamu orang mana?, tanyo saurang komandan nan barasa dari Tapanuli ka anak buahnyo nan banamo Muluik Incek Kapeh. Muluik mangko dinamoi Muluik Incek Kapeh karano inyo galia. Suko baladang di pungguang urang sajo. Kadang-kadang juo panjilek.

Kalau begitu kamu pergi dengan saya. Ambil tas saya. Kita pergi!, kato komandan tu ka si Muluik Incek Kapeh. Parewa maingek-ingek curito tu, sasudah sakian puluah taun kamudian. Di tansi Birugo tu banyak pulo kaba-kaba nan diotakan urang. Curito tantang walikota Padang Bagindo Azizhan dibunuah Bulando, sampai baparangan tantara di pron Padang. Ado pulo kompi tantara awak banyak punyo anjiang. Labiah-labiah kalau alah pulang dari pron indak tangguang gagahnyo, tapi lai baparang jo Bulando, indak usah ditanyo. Sangkek tu pron Gunuang Sariak, Kuranji, takana bana.

Ado paristiwa di musajik Jambu Aia Bukittinggi, wakatu tu ari Juma'aik tantara awak baparang jo Hizbullah. Sangkek tu pasukan lasykar Hizbullah alun masuak jadi TRI lai. Sangkek tu banyak bana lasykar. PKI punyo lasykar pulo, namonyo Tantara merah Indonesia (TEMI), ado pulo Lasykar Muslimin Indonesia namonyo LASYMI, Muhammadiyah jo Masyumi punyo lasykar pulo, itulah namonyo Hizbullah.

Kok indak takuik ka mati, indak salamaik parang, itu dikatokan dek pribahasa Minang. Kok dikunyah-kunyah kato-kato tu iyo lamak bana, sabok lamak kato dikunyah-kunyah, itu salalu dikatokan dek inyiak-inyiak awak kutiko sudah makan jo minum, katiko etongan ka dimuloi. Etongan akan mancari laki paja.Takana dek Parewa, sangkek tu sarawa tantara awak iyo gadang-gadang. Sarawa lapang, sakuihnyo gambuang. Tapi ado juo sepatu bot paninggalan Japang panjangnyo sampai ka lutuik.

Bagero na!, sorang mandua Japang maariak pakarajo palabuhan Gaduik Bukittinggi. Parewa jadi kucun, waktu tu Parewa pai jo apak Parewa nan jadi angku Kapalo. Palabuhan kapa tabang Gaduik Bukittinggi tu dikarajoan dek pakarajo-pakarajo nan didatangkan dari nagari-nagari di kabupaten Agam. Sangkek tu namonyo Agam tuo.
Jam Gadang Bukittinggi, jarumnyo taruih baputa. Sarupo sajarah Bukittinggi nan satu saat juo ikuik maundang parang sudaro. 

Sumber : http://parewasatosakaki.blogspot.com/

Artikel Terkait